فكرة لاستغلال وقت الفراغ

أهلاً أصدقائي

جبت لكم فكرة جميلة جداً لاستغلال وقت الفراغ اللي هيا التلوين

في البداية لما قلت تلوين كان الكل يضحك عليا ويقول ليه طفلة بس مؤخرا شفت انتشر بشكل كبير دفاتر التلوين للكبار وسارت فكرة مستساغة جداً

وعلمياً  التلوين للبالغين ((يساعد على التركيز والاسترخاء ومكافحة الضغط النفسي، على ما يؤكد المروجون لها، في ما بات يشكل ظاهرة اجتماعية في ظل الارتفاع الكبير لمبيعاتها في فرنسا)).

وشخصياً من الطفولة كنت اعشق شيء اسمو تلوين ختمت كل الكتب حقت الاميرات والشخصيات الكرتونية.

وقبل فترة كان عندي وقت فراغ بشكل فضيع واشتريت الوان ودفتر تلوين خاص للكبار عشان اجرب وشغلت قرآن بصوت هادئ وحطيت السماعات ودخلت جو مو طبيعي اندماج وتأمل في الآيات واسترخاء ونسيت هموم الدنيا ومخي صفي جداً واكتشفت اني ما زلت استمتع بالتلوين وسرت في أي وقت احسني محتاجة هدوء وراحة اجيب دفتر تلويني والألوان وكوب قهوة والسماعات واعيش الجو يا اما قرآن او أناشيد حمود الخضر او الوسمي لان اناشيدهم جميلة ومتفائلة او حتى أغاني معينة المهم ادخل جو واروق واطرد كل الطاقة السلبية في الجسم.

مو شرط يكون التلوين فنان او مثالي المهم متنفس لمشاعرك وخلاص.

أول حاجة هذا دفتر تلويني طلبته من امازون هنا

حسيت فيه رسومات منوعة سواء طبيعة أو أشكال هندسية أو زخرفة واتوقع عددها 48 وسعر الكتاب 5 دولار تقريباً مرا يا بلاش.

فيه أشكال كتب متنوعة كل وحدها وزوقها بس أنا كتبت رأيي في اللي جربتو واللي تبغى أنواع ثانية بس تكتب في امازون (adult coloring books) وتختار اللي يعجبها.

ثاني حاجة الألوان اخذتها كمان من امازون جودتها جداً رائعة والوانها متنوعة 72 لون بس 36 قطعة يعني اللون في منو حبتين فوق وتحت.
 سعرها 20 دولار (قبل فترة كان 30 لما اشتريتها)

اسم الالوان  Solabela وهنا تلاقوها

 التلوين مو شرط يكون مثالي بس هواية وطرد طاقة سلبية واسترخاء.
بعض الصور لتلويني احم

الببغاء لونتو في الطيارة لما كنت جايه من السعودية

 أتمنى يعجبكم الموضوع واي استفسار اكتبوه ليا في التعليقات.

أتمنى دائماً تكونوا مبسوطين ومروقين وعندكم طاقة إيجابية .