مجموعة الكريسمس الجميلة من L'OCCITANE

أهلاً بكل الأصدقاء

جدأ جدأ مشغولة دي الفترة بس حبيت أنزل التدوينة قبل يروح العرض اللي حأتكلم عنو عشان افيدكم زي ما استفدت.

العرض هو مجموعة الكريسمس من  لوكسيتان.

Holiday 2016 Advent Calendar

 * الصور جداً متواضعة من الايفون و snap بالتحديد المهم يوصلكم العرض.

بدايةً انا مو مرا احب لوكسيتان لعدة أسباب :

1.   بعض  روائحهم ثقيلة نوعاً ما، ما حسيتها تناسبني لشور الصباح .

2.     الروائح محدودة جداً مافي خيارات واسعة ولا اتوقع تتجدد مع المواسم.

3.     اسعارها غالية للطبقة المتوسطة.

4.     نادراً ما يسووا عروض وخصومات مجنونة زي باث آند بودي ووركس.

الشركة فرنسية ومنتجاتها جودتها عالية واتوقع دا السبب.

المهم انا طلبي المعتاد والمكرر كريم زبدة الشيا حقهم وكل ما خلص ارجع اشتريه جداً رائع وترطيبه عميييق يعني عصرة تكفي اليد كاملة وممتاز جداً للشتاء فيه منو حجمين واحد 12 دولار والثاني 28 دولار.

هنا رابط الشراء 

في منتجات جميلة عندهم بس نرجع لموضوعنا الاساسي اللي هوا تقويم الكريسماس.

مرا ناسبني بشدة لأني اعشق شيء اسمو احجام سفر أولاً شكلها كيوت وتخرفن. ثانياً تناسبني جداً لأني اسافر كثير واتكاسل كل مرا اعبي عينات. ثالثاً لأني احب اجدد وامل بسرعة من الروائح. اخيراً لأني مو مرا احب لوكسيتان ولا احب اخسر مبالغ على اشياء ممكن ما تناسبني يعني العرض اداني فرصة اجربهم واحكم ههههه

العرض عبارة عن 24 علبة ميني تجمع ثلاثة ارباع منتجاتهم في علبة مصممة بشكل كيوت.

هما مسوينها على اساس كل يوم تفتحي منتج وتجربيه بس انا فتحتهم دفعة وحدة وكل مرا اجرب شيء معين.

الجميل في الموضوع سعرها حالياً فقط 55 دولار يعني قريب 220 ريال .

ومجموع قيمة منتجاتها بدون العرض 107 دولار يعني قريب 500 ريال شايفين الفرق نص السعر عرض مغري جداً.

هنا رابط الشراء قبل ابدأ اتكلم عنها .

خلوني اوريكم اول ما وصلتني عشان تعيشوا الحماس معايا ههههه

عادة التوصيل خلال يومين بس انا طلبتها عالويكند ووصلتني بعد 6 ايام بالزبط وجداً كنت متحمسة.

البوكس لما وصل

تحت عاليمين بوكس خاص للهدايا مرات يضيفوه مجاناً ومرات تدفعي عليه انا وصلني مجاناً

جميل مررا وجودته حلوه انا حفظت فيه المنتجات بعد ما فتحتها.

يجي معاه تغليف ذهبي جداً مرتب وانيق وشريط مطاطي كحلي :)

كمان ادوني خصم 10 دولار سواء اون لاين او من محلهم + 3 عينات صغنونة اخترتها بنفسي من الموقع

ما لقيت صورة واضحة للشنطة بس اتوقع واضح حجمها تكفي 6-10 من منتاجهم الصغنونة وتنفع للسفر لونها فوشي وعليها اسمهم.

بالنسبة للكيس المغلف عبارة عن مجموعة سفر قيمتها 15 دولار 
(كان عندهم عرض اذا اشتريتي بأكثر من 45 دولار، تاخذيها مجاناً)

حالياً اضافوا مجموعة اكبر قيمتها 20$ اذا اشتريتي باكثر من 45$ ومجموعة اكبر كمانا اذا اشتريتي بأكثر من 127$ يعني اطلبي لأكثر من شخص واكسبي الهدية ولا تعلميهم عنها ههههه .

وأخييييييييراً وصلنا للبوكس العجيب 

دا شكلو من برا تفتحيه من جوا عبارة عن نوافذ او ابواب مكتوب عليها ارقام من 1-24 لكل يوم في الشهر منتج

ومن ورا مكتوب جميع المنتجات الموجودة وانواعها (جل استحمام / صوابين / عطور / شامبو للشعر / لوشنات / حليب جسم / تونر / زيوت)

طبعاً أنا اتحممممست وفتحتها كلها 

وهنا كل محتوياتها 

كل الاشياء اللي ذكرتها فوق فقط دفعت عليها 55 دولار ومع الضرائب والتوصيل 60 دولار فقط متخيلين ؟

اذا حابين تتابعوا معايا تقييم منتج منتج تابعوني على سنابي او انستقرامي وحيكون موضوع متجدد لأني جربت 4 فقط منهم وباقي 20.

واذا تقدروا تطلبوها ابداً لا تترددو لأنهم نادراً ما يسووا عروض قوية وحالياً موقعهم مليان عروض ولأنها منتجات تستاهل. الروائح تشبه العطور الفرنسية وعطور الفنادق.

أتمنى عجبكم الموضوع وكان خفيف لطيف.

تحياتي :

آلاء الحسيني 

اذا تبغوا المزيد تابعوني حساباتي عبارة عن (يوميات طالبة مجتهدة دراسياً في امريكا + تقييم منتجات امريكية + وصفات سهله للمبتعثين + عبارات تفاؤل + القليل من الضحك والفرفشة + رحلات لمناطق مختلفة في امريكا)

سنابي :  qween_lola

انستقرامي : alaa_alhuseini

رابط مدونتي : http://alaaalhusseini.blogspot.com/

واقي الشمس بين امريكا والسعودية -تجربتي مع واقي الشمس-

أهلاً بمتابعيني الصامتين  

:)

تدوينة اليوم عن حاجة مررا مهمة بالنسبة للمبتعثات والكل يبحث عنها فحبيت افيد اي وحدة تعبت تبحث زيي عن واقي الشمس المناسب.

أكيد ما فيه مبتعثة الا وتشتكي من اشعة الشمس الحارة خاصة في جنوب امريكا يعني البعض يحسبو الموضوع دلع ويقول ع اساس جايين من اوروبا :(

بس حقيقي اشعة الشمس حقتهم ابداً مو زي عندنا طبعاً ما حأتكلم من ناحية جغرافية لأني مررا مو حقت جغرافيا بس اللي احس فيه والبنات يشتكوا منه .

 عندنا في السعودية شمس حارة وجو حار لانو نفس الهوا حار مو لان الشمس قريبة. الشمس بعيدة ونحس دائماً حر سواء في غيوم أو لا لأن نفس الهوا حار. 

أما هنا في امريكا الجو نفسو النسيم مو حار لكن الشمس جداً جداً جداً حارة وقريبة من الرأس بشكل مو طبيعي وتسمررر كل الجسم حتى المغطى بالملابس و مجرد ما يجي غيم ويغطي الشمس يبرد الجو ويسير جميل حتى في عز الصيف لأن مصدر الحرارة اتغطى.
شمسهم متعبة بشكل مو طبيعي يعني طول سنواتي في السعودية استنى السواق تحت الشمس او اخرج في النهار وقت طويل ولا مرة يديني اتغير لونها ولا انحرقت أما هنا في امريكا بس انشغلت اول فترة وما لقيت واقي شمس وكنت اسأل وابحث واجلت الموضوع مع الدراسة والصيف قلبت يديني بشكل مو طبيعي يعني لما اجتمع مع صحباتي ويشوفوا كفي يدي وباقي يدي ينصدموا كأنها شوكلت جنب حليب عارفين الشوكلت اللي معاها كريمة بيضا كدا الشكل خخ

يعني مرا زعلت على بشرتي وصحتي وقلت لنفسي ستووووووب ركزي ع يدك شويا

وبدأت اهتم بيديني اهتمام خفيف يعني كل اسبوع اقشرها وارطبها يومياً وقفازات حماية من الشمس ولاحظت الحمدلله فرق جميل بالنسبة للمدة.

وطبعاً أهم نقطة كنت مهملتها واقي الشمس لليدين روحت مباشرة اشتريت واقي.

 في السعودية كنت استخدم منتجات بايوديرما وجداً جداً رائعة ولا عمري عانيت معاها

Bio derma Photoderm

الواقي جداً جميل وطبعاً زي كل كريمات الحماية من اشعة الشمس الضارة له انواع مختلفة على حسب التغطية المطلوبة 50 SPF أو  SPF100
  بس قرأت كثير إن نسبة 100SPF مضرة لانها تمنع البشرة من اشعة الشمس كلها سواء نافعة او ضارة بالاضافة لإنها تمنع وصول الاكسجين للبشرة واصلاُ الشركات تستخدمها لجذب الناس لا اكثر ولا اقل.

كمان  في انواع متنوعة حسب البشرة حساسة دهنية جافة مختلطة إلخ.....

وكمان الانواع تختلف ع حسب رغبتك اذا تبغي واقي شمس بكريم اساس وتريحي نفسك من كريم الاساس او تبغي بس واقي شمس.

غالباً كريم الاساس ما حيكون تغطية كاملة زي المكياج بس حلو للدوام اقرب لبي بي كريم يعني مجرد اشراقة وتغطية للعيوب البسيطة .

 بايوديرما صراحة جميل جميل ابداً ما عانيت منو خاصة اني اخترت النوع بعناية يعني يتوزع بسهولة وسلاسة وحمايته مرا ممتازة وما يطلع لي حبوب ولا حاجة  وريحتو كويسة مافي ريحة مزعجة .

وأهم من هذا كلو (طبي) ودي اهم نقطة لاختيار واقي الشمس انو يكون طبي.

لما جيت هنا امريكا اخذت معايا علبتين وجلست شهور بعدين طلبت من امازون.

 من هنا

وبعدها تعبت من الطلب وانتظار الطلب وحاولت ابحث عن واقي شمس بديل يكون هنا في محل اريح من سالفة الطلب اون لاين واستنى فترة على ما يوصل قلت اروح اخذ من محل افضل.

طبعاً شيء صناعة امريكية وكويسة مالقيت ابداً كلها رخيصة ومرا كنت اقرأ مكونات واقي الشمس واقارن بين المميزات واحاول الاقي اقرب شيء لبايوديرما.

لقيت وأخيراً شركة

 LA ROCHE-POSAY

 

طبعاً الشركة فرنسية جداً مشهورة بمنتجات البشرة والكريمات وثقة واهم نقطة عندي طبي لأني ما احب استخدم منتج استخدام يومي وهوا تجاري لازم طبي مرا مرا مرا يجنن وسعره 36 دولار اخذته من محل

 ULTA

التا محل مكياج مشهور في كل الولايات تقريباً وهذا موقعهم 

هنا

في البداية اخذت نوع من نفس الشركة كان مرا مرا دهني سار وجهي يلمع ويلصق وخشمي دهن عارفين الشعور المزعج

بعدين اخذت نوع ثاني

أول ما حطيتو كم يوم كان ما يتوزع بسهولة وجاف استغربت بعدين اكتشفت لأني اغسل وجهي بغسول صباحي للبشرة الدهنية يزيل كل الدهون ويخلي الوجه مشدود ونظيف وجاف.

المهم غيرت خطتي وسرت اغسل وجهي بالغسول واجففو بعدين احط كريم مرطب خفيف واروح اسوي الفطور والبس ربع ساعه يكون امتصتو البشرة لأنو خفيف مرا وبعدها احط واقي الشمس واخرج من البيت.

ومرا زبط معايا الحمدلله بس ما زلت افضل بايوديرما بكم نقطة اللي هيا:

1 - بايوديرما توزيعه اسهل ما يأخذ وقت الصباح.

2 - بايوديرما كريمي اكثر يعني ما يحتاج كريم ترطيب قبل زي لا روتشي بوساي.

3 – بايوديرما ارخص يعني بايوديرما 20 دولار وبعض المواقع 25 دولار = 100 ريال نفس السعودية كنت اخذو ب 100 ريال أما بالنسبة للا روتشي سعره في محل التا 36 دولار يعني 144 ريال وحجمو صغنون حق شهرين اذا استخدمتيه مرا وحدة في اليوم.

بالنسبة ليا كلها جميلة بس احب بيوديرما عشان السعر وعشان اختصار الوقت اذا صحيت متاخر بس احطو سريع وخلاص. 
صورة واقي الشمس تبع الوجه من تصويري

 

ولليدين اخذت من نفس الشركة بس 60 SPF حسيت ابغى حماية اكثر من حق الوجه وصراحة ما اقدر احكم عليه ما كملت شهر من استخدامو بس مبدئياً حاستو مرا حلو واعيد استخدامو كل ساعتين لأني طول اليوم اتنقل من مبنى لمنبى.

حجمو مرا حلو

معليش اذا الصورة مو واضحة مصورتها في مكتبة الجامعة >> واضحلكم قوة الشمس

وهنا الرابط من امازون

اخذته من امازون سعره 35 دولار يعني 140 ريال بس حجمو مرررا مرا اكبر من حق الوجه لأنو مخصص للوجه واليدين بس هوا الدهني اللي قتلكم عليه ماناسبني للوجه ناسبني لليدين تمتصه سريع و ما يلبق ولا حاجة وفي امازون 
ارخص من محل التا.

  واخيراً الحمدلله لقيت واقي شمس طبي وكويس ليديني ووجهي وبإذن الله حأستمر عليه لأن النتايج مرضية .

أي استفسار اكتبولي في التعليقات.

وشكراً للمتابعة.

آلاء